Tondû kwîragwo ona wa mûûru ûcirwo ta wa mwega reke tûikîrie athamaki arîa kenda mûihûru arîa maciiraga ciira wa maa na kîhoto ûrî wa mûciî,ûgûrani,ng’ûndû kana bûrûri nao matariî taû;

1. Gwata Ndaî
Giikaroini gia ciira wa wama na kihoto wari king’ara ti gwata ndai agakigwatia athamaki acio angi ndai na nî gwatûra mîtwe yao mohîganie o ta ûrîa ndaaî ciumaga he cuma ciathegethana na ciira ûkûgerekwo na ndaî ta rîu no ûkorwo arî ciira wa ng’ûndû no amagwatie akîmorie "nyama îrî kîrumi"magîcokie na makîremwo makîmûgace na ngamba noru akîmeere nî kîga.Akîambîke ciira na kûûmera kîîga kîrî kîga nî kîagagagia.Nao athamaki acio angî tondû no oogî marahûre meciria nîguo maciire tondû ona waigua wambaga na ndaa wa kîrîmû ûtûraga kîharo.

2. Wanaruona
Wanaruona anarumenya na mûthamaki ûyû nîarî akorwo macirainî maingî na nîwe ugaga ûciragwo na ungî (precedence) ,agakîhûthia ciira na njîra Nene maa tondû nîmûûî ciira ûtûragia mûciî na ûkîa,wanatûra kîharo na wambaga na ndaa na ûrî na ndoco.

3. Mûtema kûmû
Mûtema kûmû agatemania atari na guoya ,akaheana ûhoro cararûkû na agatema na kanua na ti Mwende tondû arîa matemanaga matiendwo.

4. Mwariama
Mwariama naake akoerera na agatîtîrithia na agathingata maa tondû hatarî maa ona kîhoto gîtionekaga.Enjagîra maa na ciûria na kûiguithia gîikaro kîu gîa athamaki aakaru ûrîa kûhana.

5. Gacuca
Gacuca naake nîetagwo maa yaheanwo tondû nîkwambîkaga ciira wa gûkana na njûkanîrîro nîwe ûcucaga ûhoro na gûcuka mîtî nîguo kûhoreria ngarari na njûkanîrîro cia acirîrwo.

6. Mûrûnga
Mûrûnga akamiririkani mawatho ni mitaratara,akarûnga ûhoro wa ciira ndûkaage kwagarara mîtaratara ya maciira .

7. Mûiguithania
Mûiguithania nîwe ûcokagîrîra acirîrwo na aciiiri agakîmaiguithania nîguo matikarakare maikanîrie mooko kana matiganîrie ciira na nî arî ûgo wa kwaria na kûiguo nîo Wacira,Njama,Wa njama.

8. Kagica
Ciira ndûre itherû na nîûtubagia Ngoro ûkambîka ûthû ona ûkahanda rûûmena na rûthûûro na nîguo Ngoro cia aciiri na acirîrwo ihorere cithuthagîrwo nî kagica akamainira,nî mûrebeti na mûini wa gîcandî ûrîa wambaga kûmatwara “commercial break” wakaira Ciira ûtuo

9. Mwanîki
Mwanîki naake ota ûrîa ambaga kwîyanîka wakaira anîke mwatû akanîka ciira ûrîa ûgûtarie kuuma kîambîrîria nginya mûico na njîra nguhî mûno na athamaki makîiguithania nîma nîguo ciira ûgatuîka wa gûtirihwo.

10. Kîhoto
Agagîcoka, kihoto naake niwe mutuithania na niwe wiragwo oinaga uta mugeete.Nîwe ûthuthuragia maaa na akambîka kîhoto tarîu kûngîkorwo nî mûndû ûkûraganîte na arîa moragîrwo mûndû wao mena ûru na marûrû maingî agakiuga matikûragana nîguo merîhîrie no nî megûtoca ithe wa mûûragani tondû matikûhe hiti keerî na kûgîa kîimba kîngî gîa kûrîo nî hiti.

Maumîrîra ma ciiira no magîe ndoco,gûthînjanwo,gûikio na kîano,kûgaragario na mwatû,gûcinwo na matharara,kûringa thenge kana gîthathi na mangî maingî.

Icanîtwo nî - Mûtûra Wa Wairîma (Mûnjirû wa Mbarî ya Wanyaga)